Hella, Þorláksmessuskata og góður endir á deginum.

Ég hóf daginn á því að fara til Hellu.  Á leiðinni þangað stoppaði ég við hjá vinum mínum Ingva Karli og Kristínu á Rauðalæk og skellti á þau jólakveðju.  Því næst var haldið til Hellu þar sem ég hitti m.a. Þórir lækni.  Málið að gamli maðurinn er komin með tennisolnboga og eftir árangurslausa lyfjameðferð þá var ákveðið að sprauta mig með sterum og sjá til hvort það lagaðist ekki en læknirinn bjó mig undir að þetta gæti tekið einhvern tíma.  Ég var að hugsa það á bakaleiðinni hvað það er gott að vera með svona góðan heimilislækni og hvað það hefur mikla þýðingu fyrir mig.

 

Ég fór síðan í Þorláksmessuskötu hjá VGH verktökum og en þeim góða sið hef ég haldið í nokkur ár.  Allt var þó með breyttu sniði, búið að dekka upp borð á miðju gólfinu á verkstæðinu og virkilega notalegt að hitta fjölskylduna hans Halla og tala nú ekki um fólkið mitt og aðra vini.  Skatan frábær, saltfiskurinn mjög góður og virkilega skemmtileg stund.

 

Ég fór síðan heim og það var ferlega vont að þegar deyfingin var að fara úr höndunum og helv... verkur fram eftir öllu kvöldi.

 

Ég hitti Kristu systur mína, borðaði með mömmu og pakkaði inn þeim jólagjöfum sem ég ætla að gefa á morgun og síðan er það útakstur um hádegið á morgun, fara uppí kirkjugarð, skella sér svo í bað og borða svo hjá Sesselju, Halla og fjölskyldu.

 

Það er ótrúlegt hvað ,,jólastressið” hefur lítið gagntekið mig og hver jólin öðrum betri.  Lífið er eitthvað svo ljúft núna að það er ótrúlegt en svona getur þetta verið. Spjallaði í gær við Óðinn Burkna vin minn en hann er fluttur í nýja húsið og þetta gengur allt vel hjá honum - farinn að vinna hjá Landgræðslunni.

 

Svo í kvöld átti ég fína stund.